Sampai juga India.

Aduinaa. Punyala nda ada masa mau lawat2 nih blog suda. Siou ah yang sentiasa tunggu update sa. Haha. Kalau adalah.
   Ok, ni kali saya mau cerita pasal trip sa pigi India baru-baru nih. Padahal kan, sa nda pernah tefikir pun mau pigi tu negara. Pernah lagi saya cakap sama diri-sendiri, sa nda akan jejak pun India. Nah, last2 tepigi juga.
   Kawan ofis sa la bah nih yang berabis membawa. Ngam2 dia pun pernah pigi juga dan bila dia cerita pengalaman dia di sana, trus sa pula yang begatar mau pigi ah.
   Oklah, trus pigi point asal. Mau tau kan, dekat sudah sa nda tepigi sana coz tetinggal flight time sa mau pigi KL dari KK aritu.
   Kami naik AirAsia turun di Kolkata. lepas tu, di sana kami stay dua malam padahal plan asal hari kedua mau pigi trus di Agra yang ada Taj Mahal tu. Tapi, tiket kretapi habis nih. Sadis. Haha.
   Teda apa-apa sangat kalau di Kolkata jadi di sana kami jalan-jalan biasa sajalah.
   Paling sandi time kami naik train 20 jam dari Kolkata pigi Agra. Nda taulah saya mau cakap pengalaman paling pahit ka nda tapi mimang sengsara bah dalam train, teda aircon lagi, panas lagi, trus bercampur lagi sama urang durg yang macam2 kerenah. Nasib baik nda bau. Tapi, tu kepanasan ba, 47 darjah celcius kan, memang air sejuk pun trus jadi air suam ba.
   Tapi bila sampai Agra, mimang paling sioklah tu feel. Saya masih nda percaya sudah jejak kaki dalam Taj Mahal, antara tujuh keajaiban di dunia. Susah mau explain tu perasaan melainkan sendiri sudah ada dalam tu bangunan. Magik nih, macamanalah urang dorang dulu2 bulih buat rekaan telampau cantik macam tu sekali. Very detail bah.
   Lepas satu malam di Agra, trus kami naik train pigi New Delhi pula. Ni kali, train yang kami naik mimang orang kaya punya train, jadi tedalah mau komplain2. Haha. Satu malam ja kami di Delhi sebab bisuk pagi trus kami fly pigi Srinagar pula.
   Sampai Srinagar, tekajut nih pulis di mana2. Kedai2 pun tutup semuanya. Tapi sioklah di sana sebab bersih sikit (sikit jakla.masih ada habuk2), tapi yang paling best, macam rasa bukan di India pula di sana. Habis urang dia semua yang patern2 urg Pakistan tapi high-class punyala. Mata biru, hijau, coklat, semua bulih jumpa di sana.
   Macam2 kami buat di Srinagar. Kami tinggal di Kashmir 4 hari dan pi lawat dua tempat, Pahalgam sama Gulmarg. Since dua2 tu tempat jauh (3jam mau pigi) dari Kahsmir, jadi kami spend satu hari untuk satu tempat.
   Sioklah Kashmir. Urang dia bagus2, mimang senang mau buat kawan. Walaupun ada jugalah yang macam mau kawan2 sebab jual barang atau bisnes2 lain, tapi dorg approach bagus2.
   Last day, kami balik pigi New Delhi. Kunun mau berjimba lah, tapi punya susah mau cari tempat yang happening. Last2, pigi mall juga kami trus tershopping ni. Haha.
   12 hari sana, paling siok dan mimang sa mau pigi lagi lepas nih. Tapi ni kali mau pigi time musim sajuk pulalah. Coz  nda ketahanan betul kalau musim panas. Tekupas-kupas nih kulit muka.
   Bah, nda lengkap kan kalau nda show-off gambar2 time di sana. Nah!

 Bandar Kolkata.

 Sadap nih. Masal udang sama roti parantha.

 Dalam Agra Fort. Istana di Agra.

 Gambar dulu sebelum masuk Agra Fort.

 Main salji di Gulmarg.

 Nih mimang mimpi jadi kenyataan.

 Tempat buat kasut di New Delhi.

 Rumah bot di Kashmir, Srinagar.

 Menara di muzim kretapi, Kolkata.

 Pintu kubah dalam tu AGra Fort.

 Gila nih dua urang tapi banyak tolong kami di Kashmir.

Nah. Susah nih kami naik p atas. Kesakitan buntut naik kuda. Curam lagi tu jalan. Di Pahalgam nih.

Bah, siapa yang kunun nda mau pigi India tu, sa cakap lah mimang rugi. Kalau ada yang mau pigi dalam masa terdekat, jan malu2 minta tips sama sa. Aiseh.

  

2 comments:

jasper Malickey said...

lawala bro

Jasper....

ayuniharis said...

Saya ingat nk pegi kalkota dalam masa terdekat ni.apa lagi menarik sana.sesuai ke nk honeymoon